Para referenciar esta páxina empregue o enderezo: http://www.usc.es/herbario

Visita actual desde 38.107.179.231 ( visitantes neste momento)
visitas totais

Resumo

Os 100000 exemplares do herbario da USC son a maior colección botánica de Galicia, de enorme potencial educativo, pero descoñecida polo público ao ter unha finalidade investigadora e carecer de presuposto para a súa divulgación ao estilo tradicional (exposición dos exemplares nun espacio físico aberto ao público). Pretendemos crear un espacio virtual permanente de acceso visual ás coleccións, para que o público poida visitalas a través de internet ou mesmo participar achegando comentarios ou datos propios.

Inauguración

Do 17 de novembro ao 23 de novembro de 2008, durante a celebración da Semana da Ciencia, pero coa intención de mantela permanentemente aberta no futuro.

Descrición da actividade

Esta actividade, aínda que encadrada na Semana da Ciencia 2008, pretende ter continuidade no tempo e ser o punto de inicio para a divulgación das coleccións do herbario SANT ao público alleo á investigación botánica. Os obxectivos básicos iniciais son os seguintes:

Limitar a exposición á colección principal do SANT: plantas vasculares (é dicir, fentos e plantas con flores), e priorizar especies comúns que medren espontaneamente no medio natural galego.
(polo tanto, non se incluirán plantas cultivadas, forestais ou ornamentais)

Seguindo o mesmo criterio, as plantas serán agrupadas dun xeito natural, facendo grupos de especies con tendencia a medrar no mesmo medio ecolóxico (dunas, brañas, bosques, etc).

A web disporá de imaxes dos exemplares a moi alta resolución, de xeito que os visitantes poidan examinalos cunha escala de detalle moi superior á do exemplar a tamaño natural.

O público visitante poderá participar activamente de diversos xeitos:

• Aportando comentarios persoais sobre aquelas especies que recoñezan (por exemplo, nomes galegos empregados para unha planta nunha localidade concreta de Galicia, ou usos populares de todo tipo -artesanais, medicinais, alimentación, etc- para esa planta nesa localidade).
  O conxunto destas contribucións do público será logo preparado para poder ser visualizado na mesma web, de xeito que queden reflectidas as contribucións procedentes das distintas zonas xeográficas de Galicia.
• Alén das especies inicialmente expostas, durante a Semana da Ciencia o público poderá solicitar ao herbario a dixitalización doutros exemplares, que serán encadrados tamén nalgún dos grupos ecolóxicos previamente establecidos.
  (No caso de existiren un número moi elevado de peticións, darase prioridade ás especies máis frecuentes e que mellor se axusten ás peculiaridades dos grupos establecidos).
• Dado que esta exposición pretende ter un carácter permanente, serán benvidas calquera outro tipo de suxestións ou ideas do público de cara futuras melloras ou ampliacións da mesma.